Arkupehotsak 2025

Arkupehotsak 2025
Musika sortzaile berrien plaza izaten jarraitu nahi duen Arkupehotsak ekimenaren zazpigarren edizioa martxan da berriz.

 

Azpeitiko Kulturaz Kultur Kooperatibaren ekimen bat da eta musika sortzaile berrien plaza izaten jarraitu nahi du Arkupehotsakek bere zazpigarren edizioan. Musika eta soinuaren inguruan sortzea, ikastea eta berau plazaratzea dira proiektuaren lan ildo nagusiak. Horrela, formazio teknikoa, artistikoa eta kontzertu bat eskaintzeko aukera izango dute talde edo bakarlariek.

Musikari berrien plaza izateaz gain sormen prozesuaren fase guztiak sustatzea da xedea. Horretarako, aukeratuak diren taldeek Dinamoa sormen guneko Soinuaren eremua erabiltzeko aukera izango dute, entsegua egin eta zuzenekoa prestatzeko. Gainera, talde guztiek bi formakuntza saio jasoko dituzte; teknikoa, lehenengoa, Jon Badiolaren eskutik eta artistikoa ondoren, Gartxot Unsain eta Idoia Asurmendiren eskutik. Azkenik, emanaldia eskainiko dute Sanagustin kulturgunean. Egonaldiak zein kontzertuak argazkiz erregistratuko dira. 

Emanaldi kolektiboa udaberrian izango dira. Formakuntza eta egonaldia hautaketaren ondoren zehaztuko dira taldekideekin batera.

 

Kitziki, Rekiem, Karena eta Pertz taldeek parte hartuko dute aurten.

Rekiem metal eta rock doinuak lantzen dituen talde azpeitiarra da. Duela bi urte sortu zen, eta lehen kontzertua Zarauzko Hiruputzu gaztetxean eman zuten. Ordutik, hainbat gaztetxetan eta herriko festetan eskaini dituzte kontzertuak. Laster LP bat grabatzeko asmoa dute. 

Kitziki taldeak jai giroko erromeria estiloko musika jotzen du. Duela urtebete sortu zen Elgoibarren eta lehen kontzertua Abaraxka aterpetxean eman zuten 2024ko martxoan. Ordutik, Elgoibarren eta Azkoitian kontzertu ugari eman dituzte.

Karena Antzuola eta Hernaniko taldea da, eta pop eta folk doinuak lantzen ditu. 2022an sortu zen taldea eta hasiera hartan, bi urtez, euskal kantuen bertsioz osatutako kontzertuak ematen zituzten. 2024ko martxoan ordea, lehen diskoa kaleratu zuten. 

Pertz 2024. urtean Zumaian sorturiko pop rock taldea da. 'Ezarritako Arauak' izenpean kaleratu zuten lehen lana martxoan, eta 2025ean bigarren disko baten grabaketarekin hasteko asmoa dute. Taldekideek Zumaiako musika eskolan ikasi zuten, eta azken urteotan hainbat proiektutan parte-hartu dute: Blowing soul, Breakkin Brokoli, Parrazta, Biderbost eta Hamarru elektrotxaranga.

 

SORTU. IKASI. PLAZARATU

SORTU
Talde bakoitzak Dinamoa sormen guneko Soinuaren Eremua erabiltzeko aukera izango du entseguak egin eta zuzenekoa prestatzeko.


IKASI
Talde guztiek bi formakuntza saio jasoko dituzte, bata teknikoa eta artistikoa bigarrena.


PLAZARATU
2025eko udaberrian emanaldi kolektibo bat eskainiko dute aukeraturiko talde guztiek Sanagustin kulturguneko arkupeko eszenatokian. Komunikazio eta promozio berezia egingo zaie musikari eta musika talde berri hauei.

   

Arkupehotsak_berria_web.jpg